DISKURSU HUSI S.E. PREZIDENTE TAUR MATAN RUAK IHA OKAZIAUN KOMEMORASAUN TINAN 20 ATRIBUISAUN PRÉMIU

By Daucua 07 Out 2016, 17:30:59 OTLOpiniaun

DISKURSU HUSI S.E. PREZIDENTE TAUR MATAN RUAK IHA OKAZIAUN KOMEMORASAUN TINAN 20 ATRIBUISAUN PRÉMIU

Palásiu Prezidente Nicolau Lobato, 7 Outubru, 2016:

Señór Prezidente Parlamentu Nasionál, Dr. Adérito Hugo da Costa,

Señór Primeiru Ministru, Dr. Rui Maria de Araújo,

Señór Prezidente Tribunál Rekursu, Dr. Guilhermino Silva

Tuirmai ha’u sei hato’o ha’u-nia kumprimentus ba bainaka internasionál sira:

Señór Prezidente Joaquim Alberto Chissano,

Dr. Kailash Satyarthi, Prémiu Nobel ba Pás,

Prof. Brian Scdmidt, Prémiu Nobel Fízika nian,

Prof. Erling Kydland, Prémiu Nobel Ekonomia nian,

Prof. Muhamad Yunus, Prémiu Nobel Ekonomia nian,

Sir Richard John Roberts, Prémiu Nobel Medisina nian,

Dr. Adama Dieng, Konselleiru Espesiál ONU nian ba Prevensaun Jenosídiu,

Reverendísimu Amu-Bispu Gunnar Stälsett,

Prof. Martin Edward Hellman, Universidade Stanford,

Prof. Joseph Osterwalder, Universidade Jenebra,

Prof. Karlmeinrad Giesinger, Sirurjiaun Ortopédiku,

Prof. Roger Moser, Universidade St. Gallen,

Prof. Jenny Gordon, Australian National University,

Membru órgaun soberania sira-nian,

Señora no Señór Xefe Bankada Parlamentár sira,

Señór Prezidente José Ramos-Horta,

Señór Prezidente Francisco Lu’Olu,

Señór Prezidente Vicente Guterres,

Señór eis-Primeiru Ministru, Dr. Mari Alkatiri,

Reverendísimu Amu-Bispu Don Basílio do Nascimento,

Reverendísimu Amu-Bispu Norberto Amaral,

Reverendísimu Amu-Bispu Don Virgílio do Carmo,

Señór Prokuradór-Jerál Repúblika, Dr. Ximenes,

Señór Xefe Estadu-Maiór Jenerál, Majór-Jenerál Lere Anan Timur,

Señór Komisáriu PNTL, Dr. Hornai,

Señór Embaixadóres no Ilustres Membrus Korpu Diplomátiku,

Señoras no Señores,

Ilustre konvidadu sira.

Ho laran ksolok ha’u hato’o benvindu ba Ita-Boot sira ne’ebé mak ohin halibur malu iha ne’e. Ha’u-nia saudasaun espesiál ba ilustre omenajiadu sira ne’ebé mak hetan distinsaun ho Prémiu Nobel ba Pás iha 1996, Don Carlos Filipe Ximenes Belo (ne’ebé ohin labele dezloka an mai iha ne’e tanba razaun saúde) no Dr. José Ramos-Horta. Ema timoroan naran-boot rua ne’e hatudu ona kualidade, kapasidade no aten-barani hodi fó kontribuisaun folin-boot ba pás no estabilidade iha ita-nia rain durante sira-nia moris tomak.

Ha’u hakarak saúda mós distintu konvidadu sira ne’ebé hakat liu tasi-balun hodi mai haksolok hamutuk ho ita no halo ita-nia povu sente onra boot hodi simu sira no sente haksolok ho sira-nia prezensa iha komemorasaun ida-ne’e ne’ebé nakonu ho ksolok, tanba ita povu ida ke hetan ona pás no moris hela iha liberdade no seguransa laran.

Ha’u saúda liuliu distintu Amu-Bispu Gunnar Stålsett, ema-Noruega ne’ebé koñese didi’ak ita-nia rain Timor-Leste no akompaña Timór nia progresu tinan barak ona.

Prezensa hosi señór Prezidente Joaquim Alberto Chissano, ne’ebé mak tinan 40 liubá hatudu empeñu maka’as ba ita-nia kauza, hanesan onra boot mai ita. Orasida nia sei mai halibur hamutuk ho ita.

Ohin ita halibur hamutuk iha fatin ida-ne’e hodi selebra Aniversáriu dala ruanulu ba atribuisaun Prémiu Nobel ba Pás ba kombatente na’in-rua ne’ebé luta ba ita-nia povu nia dignidade no pás iha mundu.

Durante liu tinan 20, ho sakrifísiu barabarak, terus boot no determinasaun maka’as, ita-nia povu kaer metin ba direitu atu sai livre no hetan respeitu.

Durante liu tinan 20, ita-nia povu nia sakrifísiu hetan apoiu hosi ativista rihun ba rihun iha nasaun barak iha mundu. Ema laran-luak sira-ne’e tulun ita tanba espíritu solidariedade no domin ba Justisa no Liberdade.

Maski nune’e, durante maioria hosi tinan 20 ne’e, Timoroan sira-nia sakrifísiu ladún hetan atensaun maka’as hosi komunidade internasionál, iha mundu ida ne’ebé hakru’uk ba lójika fuan-laek hosi funu malirin ka guerra fria.

Atribuisaun Nobel ba Pás ba distintu Timoroan na’in-rua hanesan rekompensa ida ba ita-nia povu nia marxa naruk ba dignidade no kontribui maka’as atu muda lójika imorál ne’ebé sakrifika Timoroan barak.

Vizibilidade ne’ebé mak atribuisaun Nobel ba Pás fó ba Uma-Kreda Timoroan nia esforsu ho dedikasaun, no mós ba Rezisténsia nia aspirasaun ba pás durante Timór nia okupasaun, personaliza hosi figura rua ne’ebé respeitadu no aten-barani – figura Igreja ida no ativista ida.

Aten-boot no aten-barani ne’ebé hatudu hosi Komité Nobel Noruega nian hodi fó Prémiu Nobel ba Pás iha 1996 haleno loloos natureza luta nian rasik.

Rezisténsia Timoroan sempre luta ba unidade nasaun Timór nian, lahó exesaun. Ita-nia luta sempre ba pás no dignidade.

Ema relijiozu sira ne’ebé loroloron sai sasin ba povu timoroan nia sakrifísiu, fó fiar ba Rezisténsia.

Amu-Bispu Don Carlos Ximenes Belo ho aten-barani uza didi’ak nia lian hodi fó sai kona-ba Nasaun nia terus, lori valór dignidade kristaun no domin ba malu. Don Carlos fó lian ba relijiozu rihun ba rihun ne’ebé proteje Timoroan sira no terus hamutuk ho ita.

Dr. José Ramos-Horta mós ema ida ke ho aten-barani fó sai nia lian no serbisu lakole. Liuhosi nia lian, diplomasia rezisténsia fó sai ba ONU no xanselaria sira iha mundu kona-ba sakrifísiu ne’ebé ita-nia Nasaun halo no hatudu mós ba sira katak ita-nia Kauza justu duni. Nia lian informa no mobiliza ativista no rede apoiu sira-ne’ebé hala’o knaar importante tebes ba vizibilidade luta nian. Ikusmai, Dr. José Ramos-Horta sai fali Rezisténsia nia oin no lian iha rai-li’ur.

Besik ona atu selebra aniversáriu Restaurasaun Independénsia ba dala sanulu-resin-lima (15), Timoroan na’in-rua ne’e serbisu nafatin hanesan baibain hodi afirma Timór iha mundu.

Peskiza istórika ne’ebé Don Carlos halo tiha ona no nia livru sira-ne’ebé hakerek tiha ona hanesan kontribuisaun importante tebes ba ema nia koñesimentu kona-ba kultura no istória Timór nian no mós ba afirmasaun hosi ita-nia identidade nasionál.

Dr. Ramos-Horta, nu’udar dekanu hosi diplomata-ativista sira rezisténsia nian no diplomata boot liu Nasaun nian, kontinua foti Timór nia naran hodi simu responsabilidade aas iha komunidade internasionál nia leet.

Ida-idak tuir nia área, sira na’in-rua hanesan ezemplu boot ida, ne’ebé fó aten-barani ba jerasaun foun sira atu afirma identidade timoroan ho naturalidade no Timór nia integrasaun graduál ba iha komunidade nasaun sira-nian.

Desizaun ne’ebé ho matenek no vizaun foti hosi Komité Nobel Noruega atu entrega Prémiu Nobel Pás iha 1996 hanesan pontu-virajen importante ida ba ita-nia povu nia istória.

Iha tinan 1996, prezidente Komité Nobel Noruega nian, Francis Sejersted, hatete katak kazu Timor-Leste“hatudu momoos polítika mundiál nia sinizmu[1].

Komité Nobel Noruega nia desizaun atu fó Prémiu Nobel ba Pás iha 1996 hanesan denúnsia korajozu ida hasoru sinizmu no fó kontribuisaun boot ida ba funu nia rohan liutiha tinan tolu.

Prémiu Nobel ba Pás nia bensaun la’ós de’it ba Timor-Leste. Indonézia mós benefisia ho Komité Nobel Noruega nia vizaun no aten-barani. Atribuisaun ba Prémiu ida-ne’e loke tiha dalan foun ida hodi rezolve konflitu ida ne’ebé fó todan mós ba juventude no povu Indonézia sira, inklui mós ba nasaun nia rekursus.

Lori Timor-Leste nia naran, ha’u foti okaziaun ida-ne’e atu hato’o ami-nia agradesimentu kle’an ba Komité Nobel Noruega, la’ós de’it tanba iha 1996 imi rekoñese ami-nia povu nia sentimentu pás, maibé mós tanba imi-nia asaun iha jerál no kontribuisaun, liuliu iha tinan ikus hirak liubá, atu promove mundu ida ke hakmatek no respeita Dignidade no Direitus Umanus.

Sistema demokrasia ne’ebé la’o hela iha Indonézia ho Timor-Leste, no ita-nia povu sira-nia eskolla, hatudu katak pás posivel duni.

Pás ne’ebé Timoroan sira sosa ho kosar-been no raan, sei murak nafatin ba ita atu nune’e ita bele hakat ba oin ho neon ne’ebé metin hodi atinje ita-nia objetivu sira: halakon kiak no hasa’e seguransa no moris-di’ak iha ita-nia rain.

Timoroan sira sei nunka haluha katak, iha momentu ruma iha ita-nia istória, Komité Nobel Noruega nian barani atu fó sai kona-ba sinizmu no halo diferensa, hodi salva ema no kona Timoroan sira-nia fuan.

Aleinde Sesaun Plenária ho tópiku Sidadania, Pás no Moris-Di’ak, konferénsia internasionál ida-ne’e inklui mós sesaun temátika haat kona-ba asuntu tuirmai ne’e:

Meza-Kabuar ida ne’ebé foka liu ba Justisa no Direitus Umanus. Ida-ne’e hanesan asuntu importante tebes ba Estadu Direitu demokrátiku ida.

Meza-Kabuar ida fali dedika ba kestaun ekonomia no finansas, ne’ebé sei kaer hosi personalidade hirak ho esperiénsia no koñesimentu ne’ebé rekoñesidu ona.

Meza-Kabuar datoluk sei dedika ba Siénsia no Teknolojia; siénsia ho teknolojia hanesan instrumentu ne’ebé presiza iha sosiedade aban-bainrua nian.

Ikusliu, ami sei hala’o Meza-Redonda ida kona-ba saúde no medisina. Tuir loloos, saúde hanesan ferramenta sivilizasaun nian ida no liga ba evolusaun estraordinária hosi matenek no prátika medisina.

Iha programa ne’ebé mak fahe ba ilustre doben konvidadu sira, imi bele haree oradór sira-nia kualidade di’ak. Ema ne’ebé mak ami hili hodi halo moderasaun ba palestra sira-ne’e mak ema ne’ebé koñesidu ona iha ita-nia rain. Palestra sira-ne’e hotu sei inklui diskursu abertura no diskursu taka hosi membrus VI governu.

Ba Konferénsia Internasionál ida-ne’e nia loron ikus, aban, loron 8 fulan-Outubru, tuir programa ami sei hala’o Konferénsia sira seluk iha fatin oioin bazeia ba tópiku ne’ebé mak determina ona. Ami-nia instituisaun ensinu superiór sira sei envolve iha laran.

Ida-ne’e hanesan okaziaun úniku ida, ne’ebé ladún mosu beibeik, atu tau posibilidade atu aprende hosi matenek-na’in sira, ne’ebé mak kaer koñesimentu no kapasidade atu inspira, iha estudante, foin-sa’e no sidadaun sira-nia liman.

Ha’u apela Ita-Boot sira-nia partisipasaun ho empeñu, tanba buat hirak ne’ebé mak ita bele aprende hosi konferénsia ida-ne’e, ita tenke uza hodi serbí ita-nia Povu no serbí ideál ba Pás, Sidadania ne’ebé responsavel no Moris-Di’ak ba ema hotu-hotu.

Liuhosi oportunidade ida-ne’e ha’u hakarak hato’o ha’u-nia laran-ksolok ho eleisaun hosi ita-nia belun di’ak António Guterres ba kargu susar ida nu’udar Sekretáriu Jerál Nasoins Unidas. Ida-ne’e hanesan vitória ida hosi justisa no méritu. Ida-‘e vitória hosi valór sira-ne’ebé ita luta hela ba.

Exelénsia no ilustre konvidadu sira,

Ho laran tomak ha’u hato’o ha’u-nia votus susesu.

Ba ita-nia ilustre konvidadu sira ne’ebé mai hosi nasaun oioin, ha’u hakarak hato’o ha’u-nia votus estadia di’ak iha Timor-Leste no hein katak Ita-Boot sira sei lori rekordasaun di’ak ida bainhira fila hikas ba uma.

Husu boot ba Maromak atu fó roman ba lider mundiál sira no fó-bensa ba promotór sira Pás nian nu’udar umanidade nia murak boot liu.

Ba Ita-Boot sira hotu ha’u hato’o obrigadu wain.

 

Write a Facebook Comment

Hakerek ita nian komentariu husi account Facebook

Write a comment

Ada 1 Komentar untuk Berita Ini

  1. Permen Lolipop 05 Nov 2016, 16:18:44 OTL

    Info diatas sangat berharga buat kami. Thanks.

View all comments

Write a comment

Online Support (Chat)

Asesu mos ami iha

Asesu mos ami iha facebook, twitter, Google+, Linkedin no hetan mos ami nian informasaun atual iha ne'eba.

Sondajen

Nudar sidadaun Timor-Leste, Oinsa ita boot nia hanoin konaba Lei Pensaun Vitalicia?
  Presiza Halakon
  Presiza iha Mundansa
  Mantein

Komentariu Ikus Liu

  • dominoqq

    lah gw kira bahasa indonesia. haha ...

    View Article
  • Trend Softwres

    Very nice, thanks for sharing to us Enjoyed every bit of your blog.Really looking ...

    View Article
  • Information Online By Lutfi

    Much obliged to you for your site nearness. Obviously this article I read truly ...

    View Article
  • Cerita Online Lutfi

    Much obliged to you for your site nearness. Obviously this article I read truly ...

    View Article